羅家英今日（19/7）現身書展，出席新書《羅家英傳》講座，昨日講明會陪家英哥出席的「阿姐」汪明荃亦有現身，家英哥還笑說：「咁梗係啦！佢陪陳欣健都唔陪我？」
自傳講阿姐內容擲界
講到自傳內容，家英哥笑言有個「傳」字就好像講故仔，「咁當然有真有假，加鹽加醋，等大家慢慢㗳真佢。（有幾多成真？）我就話有九成真啦！」家英哥更指書中有不少趣味，會好有看頭，「可以品味一下羅家英點解對粵劇不離不棄，對電影睇法，對唱歌，對婚姻，對女人嘅睇法，呢本書都有講到。」那麼，可有講到對阿姐的睇法？「梗有啦呢樣！不在話下啦！但唔可以講太多！（係咪都係九成真？』九成九！」
談拍拖到結婚的「羅汪」AA制
家英哥續笑指，內容有點「擲界」，預了會被（阿姐）扭耳仔。問阿姐會否面紅？他就搞鬼說：「佢點會面紅呀，佢面黑㗎啫！（有無啲Sweet嘢？）多少都有啲嘅！（講當年如何追求阿姐？）咁又好似無，我哋互相追求喎，又唔係剩係我追佢，又唔剩係佢追我！等大家了解點捱過20幾年拍拖到結婚，而家已經10幾年！大家話我哋AA制，乜嘢叫AA制，呢個係我哋『羅汪』嘅AA制，同你哋唔關事嘅！（有無嘢要澄清？）揼骨？有呀！唔使澄清，佢成日問我點解唔揼骨？你好耐無揼骨喎！」
八和會館主席落敗無失望
另外，家英哥指書中也有講電影，因為電影佔了他人生三分一。問是否有分享關於周星馳的事？家英哥即說：「我梗係話佢好嘢啦！無周星馳就無羅家英嘅喜劇！無『達文西』、無『太陽能電筒』、無『豈有此理』。」最後，講到早前競選八和會館主席落敗，問家英哥可有失望？他說：「八和會館，我輸咗喇，冇所謂啦，心平氣和，輸咪輸囉，等人哋做囉，人哋後生嘛！（有無失望？）無失望，不過對佢哋無希望！」
家英哥解釋謂：「做唔做到嘢出嚟呢？我覺得要更加努力，要加陪努力！合作合群要多啲，咁就可以做得更好，我唔能夠話人哋做得唔好，亦都無話做唔做得到，佢哋會做嘅，大家有眼睇！」笑問是否可以多陪阿姐去旅行？家英哥表示：「絕對係啦！最開心係佢呀！佢話你條命喺番度喇！見到佢陰陰咀笑囉！」
足本訪問內容 請到YouTube睇片 🔴
