鄭秀文一連三晚《You & Mi 答謝會》昨晚（12/7）舉行最後一場，繼劉德華及許志安後，尾場有「歡哥」黃子華驚喜登場，令全場觀眾超級興奮。子華載了黑超，一身「歡哥」Look由台底升上來，即時全場尖叫，接着子華說自己準備了表演，但原來就是除眼鏡，身旁的Sammi都忍不住笑，然後就叫大家給予子華掌聲。
有子華當然唔少得「棟篤笑」，子華以講感受為由講足17分鐘，夠晒精彩。期間又帶領全場觀眾說「我哋一定唔會淋紅油」，叫Sammi可以放心。子華又說：「全香港最勁係你，以前香港最威水嗰個去紅館開演唱會，而家最威水嘅嚟啟德開演唱會，但就只有佢（Sammi）先有資格講，喺啟得開演唱會算係咩？你有無喺啟德開過答謝會。Sammi你知唔知你幾偉大，你而家係帶咗一個新名字畀大家，而家香港多咗兩個會，第一個叫做免費雪糕三合會，即係而家啲人會『咩呀，而家啲雪糕免費大晒呀！』第二個高級好多，就係你呢個答謝會喇！」
子華又講到今次答謝會發生了合約糾紛，他向觀眾說：「你哋係甲方，你哋買咗件貨畀咗錢，乙方（指着Sammi）交唔到貨，件貨唔理想，所以今日就邀請大家嚟，唔係場館，呢個係廠房，你睇吓，呢度係有設備㗎，有人，係有工人㗎，係做晒嘢㗎！希望大家有拖無欠，所以呢個答謝會，我覺得其實又叫做『交友會』，唔係交個朋友呀！我一講到個『交』字要小心，嗰個『友』都唔係朋友個『友』，係淋紅油個『油』呀！」
接着，子華又指 Sammi開答謝會戇居，「根本就開咗演唱會囉！開個演唱會需要啲乜？一支咪，有個場地就搞掂，嗰啲機關唔鍾意咪唔要囉！鍾意睇機關咪去『迪迪呢』囉！大家睇吓你張飛，係無一樣嘢違反商品說明條例㗎！You & Mi，鄭秀文，亞洲巡迴，前幾日劉德華仲喺呢度巡迴咗幾個圈，做乜要cancel？你唔好意思，我講，每個人畀返一半。$1880，唔使，$880現金掟上嚟！」子華又以Sammi拍《夜王》「萬歲」豪請大家任食雪糕為例，形容Sammi是個對金錢沒有概念的人。最後，子華「歡哥」上身開金唱《終身美麗》搞笑改詞版送給Sammi，令Sammi笑到合唔埋咀。
相關新聞 ⤵️
You & Mi 答謝會丨Sammi 鄭秀文為演唱會準備積極健身 成功增磅讚自己好索兼「升Cup」要買新Bra丨田木集作
