鄭秀文（Sammi）在啟德主場館舉行一連三場「答謝會」，驚喜一浪接一浪，前晚與嘉賓劉德華登上《瘦身男女》經典「朋友號」巡遊，昨晚第二場嘉賓是老公許志安，許生許太世紀手拖手合唱《一步一生》和《其實你心裏有沒有我》，甜到漏。
Sammi 表示，被通知演唱會延期後感到前所未有的考驗，她選擇積極面對，「今次一連三晚『答謝會』對我嚟講相當之特別，我諗對於現場嘅觀眾都係一個好大嘅體驗，所有嘢都好突發，所有嘢都好突然。開show前幾日收到消息，一切叫『停』，呢個『停』字相當之重。之前我做咗好多準備，團隊亦都預備咗好多精彩、好多嘢睇嘅production，但既然上天畀咗呢個考驗我，我就接受佢，用好正面、積極嘅態度接受佢！」
不過，她自覺需要更大的力量來陪伴，「原本今晚喺真正嘅演唱會上係冇任何嘉賓，但發生呢件事，我覺得今晚喺呢個舞台上，我好想有一份更加大嘅力量畀自己，因為呢幾日走過來確實好唔容易。前幾日我同呢個人講『你可唔可以嚟做我嘅嘉賓啊？我記得有一年喺紅館，開開吓演唱會冇晒電嘅時候，我叫救命，第一個諗到你，所以今次好想有呢份力量幫我去度過。』」全場Mi 迷聽到Sammi 此番話，已知道嘉賓是安仔，而音樂奏起《一步一生》後，安仔便升上台，全場歡呼。
安仔邊唱邊走近伸展台中間，而Sammi亦向他行過去，她接着唱：「沿途就算跌，要跌得好看，才能不自責，報答別人厚望，然而誰明白我沒你們所想的堅壯，我很想找個人，對我說別怯慌。」她肉緊地握着拳頭，歌詞似乎篤中她的心聲，二人四目交投，盡在不言中，安仔一手拖着Sammi，給予她最大和最溫柔的力量，全場再次尖叫。
唱完，Sammi對安仔說：「多謝你！前幾日，臨時臨急問你可唔可以陪我企喺呢個台？因為今晚第二晚，我好唔想自己一個人。於是我通知公司，可唔可以臨時加個嘉賓？因為原來有好多嘢搞，要買保險，都整得切，幫你買咗保險。」觀眾被Sammi反差萌逗得爆笑，安仔就一直甜笑望着老婆。
然後他們合唱經典作品《其實你心裏有沒有我》，Sammi笑說：「幾廿年嘅歌，好耐無唱。」安仔又忍不住笑。他們手拖手邊行邊唱，最後對望、傻笑、擁抱，非常溫馨。安仔轉身離場時，Sammi笑說：「屋企見，拜拜，See you later！」
最後，Sammi換了新裝，在encore唱《終身美麗》時穿上珍珠白色露肩裙，原來特別為香港站的歌迷而設，她說：「我喺大馬演唱會，着咗一條呢個style嘅裙，當時所有觀眾都覺得好靚。香港場我都好想着條咁嘅裙，呢條係新㗎，希望香港嘅觀眾都可以感受到佢嘅美麗。」答謝會結束前，Sammi 再三叮囑觀眾好好保存門票，可選擇退票或之後憑票入場欣賞正式演唱會。
相關新聞 ⤵️
Sammi 鄭秀文第二場《You & Mi答謝會》邀老公許志安坐陣 兩公婆拖手合唱《一步一生》《其實你心裏有沒有我》丨田木集作
