陳敏兒於6月12日因病離世，終年65歲。其安息禮今午（25/6）在於尖沙咀聖安德烈堂舉行，遵照陳敏兒生前意願，安息禮以私人形式進行，現場招待約百位親友及家屬，包括鄧萃雯、謝寧、蔡少芬與張晉夫婦、陳寶儀、林漪淇、廖安麗、賈思樂、吳麗珠、吳雨、杜棋峯、胡楓、炎連輝、劉江、鄧英敏等等。另外，廖文信的「小薯茄」同事程人富、關浩傑、吳冰和姚澤汶亦有到場；而其他公眾人士及未能出席的親友則可透過網上直播悼念。
安息禮開始，眾親友先獻唱詩歌《Amazing Grace》，然後陳敏兒教會小組的弟兄姊妹，包括陳寶儀及蔡少芬夫婦獻唱另一首詩歌詩歌《無言頌讚》。接着就是陳敏兒兩位兒子致辭時間；幼子文信首先分享與母相處點滴，表示籌備安息禮過程，才發現過程很不容易，因此想起當初爸爸離開的時候，媽媽可以在一個悲痛的情況下handle 那麼多事情，「因為當年爸爸突然在短時間離開，先明白親人不會一世陪着你，總有離開的時間，所以爸爸離開後，我都盡量抽時間陪佢。」
陳敏兒蒙古睇星圓夢
文信又憶述，當年在澳洲讀書，一家人出席他的畢業禮，媽媽有一日突然表示想睇星，我就車她出去睇，「喺一個湖邊一齊睇星，真係好多星星，就連銀河系都睇得好清楚，好記得爸爸嗰陣好唔滿意，因為當時佢瞓咗，我哋冇叫醒佢一齊去，我哋之後話喺香港再睇星，可惜之後冇機會同佢睇。」文信又謂，去年媽媽患病期間再帶她到蒙古草原睇星，媽媽表示好開心，更指自己已經遺憾。文信又分享媽媽教的「五道」，包括道謝、道愛、道歉、道諒、道別，「我好愛佢，能夠做到佢個仔，我想同佢道歉，因為有時會無耐性；而我都會原諒佢，細個時無乜時間陪我哋！最後，再見喇！媽媽！」
至於長子文哲，一開始已忍不住落淚，更一度抽泣，多謝媽媽無條件的愛。他說：「佢細個嗰陣教我，做人唔需要 fullfill任何期望，只要活得開心嘅人生、幸福，呢樣嘢我慢慢學緊。細個同媽係無所不談，反而長大後因為種種原因，生活習慣唔係太過合適而變得有距離，好感恩喺佢入院前嗰個禮拜返去陪佢，都講到我想講嘅嘢！」最後，文信結他伴奏下，文哲唱了 ONE OK ROCK 的《The Pilot </3》送給媽媽。唱畢後，文哲再說：「多謝你媽媽，對唔住，多謝你多謝我，話我係你老師，你都係我老師。」今日有到場的鄧萃雯，她說一直透過謝寧了解陳敏兒的情況，可惜對方離開那天，她剛要返內地工作，因此未能見最後一面。
