草蜢「GRASSHOPPER THREE IN LOVE CONCERT 2026」巡唱首站，於剛過去的周末（20/6）在新加坡室內體育館順利完成。草蜢表示，特別將 40 周年世界巡迴演唱會海外首站選在新加坡，因為恩師梅艷芳1986年第一次帶他們出埠演唱就是新加坡，對他們來說是意義重大，而更大的驚喜，是台下竟然有當年入場見證草蜢處男登台的 Fans！
阿智台上說：「我哋草蜢世界巡迴嘅第一站要揀新加坡，因為呢度對我哋三個好有淵源，我哋第一次跟梅姐出埠，就係嚟新加坡！」。接着傑仔問台下觀眾：「邊個1986年有嚟睇梅艷芳演唱會？」見到台下有 Fans 舉手，草蜢三子都好驚喜。阿智說：「沒有梅艷芳就沒有草蜢，所以我哋想將呢個舞台獻畀我哋嘅師傅梅艷芳，多謝佢當年帶我哋嚟到新加坡認識大家，我哋要搵返我哋嘅初心，多謝你哋支持草蜢 40 年！」
蘇志威續謂：「多謝你哋一知道我哋要嚟開演唱會，第一時間買飛，好早就賣爆晒，多謝你哋嘅支持，為我哋世界巡迴打咗第一支強心針！」觀眾反應非常熱情，完場後樂隊已退場及觀眾席已開燈，仍然不肯離開，不斷大聲嗌Encore，最後草蜢行再次回到舞台，阿智和傑少說：「你哋仲唔走？啲歌真係唱晒啦！」、「Band 都走晒喎！」但最後，他們仍是再唱多一首《暫停・開始過》始向所有 Fans 揮手道別。
草蜢演出後表示：「真係非常、非常、非常多謝新加坡嘅 Fans，好熱情！40 年前梅姐帶我哋第一次到海外登台就係新加坡，20 歲仔人生第一次搭飛機，所以我哋對新加坡有情意結，私心要揀返呢度做 40 周年演唱會嘅巡唱第一站。剛才有 Fans 舉手話 86 年有睇梅艷芳演唱會，睇過我哋表演，真係毛管戙啊！」
雖說新加坡觀眾比較內斂，但草蜢的 Fans 特別熱情，阿智說：「好少會開晒大燈都唔走，呢啲『真Encore』，盛情難卻，其實我哋三個都唔捨得走！現場澎湃嘅歡呼聲，好似喺球場睇『世界盃』比賽咁勁！」傑少稱，開心見到來自世界各地 Fans 專程飛到新加坡捧場，「好多 Fans 睇過香港站演唱會話正，話要再睇，特登飛嚟睇！」阿智就讚她們醒目，指香港紅館四面台，新加坡三面台有另一種感覺。
除了草蜢演唱會「傳統」與觀眾玩人浪，今次新加坡站加設觀眾傳波波遊戲，全場玩得勁開心，氣氛超好。阿智笑說：「知道好多 Fans 平時讀書、返工，冇時間做運動，所以加咗『碰碰波』遊戲，掂到個波嘅 Fans 都得到草蜢嘅愛。至於馬來西亞站都有新花臣，依家申請緊，希望成功，大家到時感受一下我哋為大家準備嘅心意！」另外，香港演唱會的「情歌盲盒」環節亦帶到巡唱，每晚不同驚喜，今次新加坡站演唱了《我們都是這樣失戀的》和《永遠愛着你》。
