農夫的紅館《全香港最好笑嘅演唱會》昨晚（9/5）開鑼，陸永與C君挾「最好笑」之名開騷，出場當然搞搞新意思，舞台升起時只見兩人個頭，陸永抵死笑言：「全香港最好笑嘅演唱會呀嘛，最好笑係呢度㗎啦，你哋張飛咁平，我哋個升降台係升到呢度㗎。」C君隨即接力自嘲：「其實係好事嚟，因為我下身唔係好好睇，我老婆都唔睇㗎。」最後二人再降落底，然後正式「彈」出來，再一口氣唱出Hip Hop Medley《同伴》、《冇你就冇我》、《心跳回憶》、《跟隊唔該》、《全民皆估》、《娛樂圈殺人事件》、《韓國勁舞權》、《中佬先係寶》、《Dream Girl》、《難得咁人齊》）由頭唱到尾，紅館即時化身巨型派對。
演唱會重量級嘉賓輪番登場 驚喜一浪接一浪
有農夫就當然少不了麥玲玲，今次他們更請來當今香港Hip Hop界的重量級代表——Novel Fergus及Hip Hop詩人PetPet Shawn，加上玄學天后麥玲玲驚喜化身「Hip Hop Queen」。玲玲大師升台即引爆全場歡呼聲、陸永更笑問師傅衣着為何如此「吝嗇」，師傅則表示是他們的安排。
演唱會中段，農夫宣布2025 年已成立公司「農作天下」，更即時上演一場七千人參與的「剪綵開將」。C君笑稱：「呢間公司作為行業老字號，早喺2025年已經成立。」陸永則說：「成立短短九個月，公司佔地有幾百呎，已經增設咗電動垃圾桶，佢仲識自己包垃圾㗎！」二人又笑指準備邀請古天樂、梁朝偉、周潤發簽約加盟，但尚未去傾過。之後他們更下台帶領全場觀眾齊齊為新公司砌燒豬、剪綵，祝農作天下，風生水起，笑口常開！
農夫 x 張繼聰有新搞作
緊接開張儀式，「農作天下」宣布，十月會有新搞作，送給所有結了婚的人，張繼聰隨即以「人夫集團」身份驚喜現身，與農夫換上罕見西裝合唱《我連婚都夠膽結》。然後到二人唱《學海無涯》時，Twins驚喜從舞台升出，與農夫合唱經典金曲《士多啤梨蘋果橙》，觀眾情緒瞬間「進入大癲」，陸永向剛新婚的阿Sa連聲恭喜，阿Sa笑住回應：「多謝多謝….我哋頭先喺台下面睇好high呀，好好笑！」C君即笑言：「話咗你哋fan meeting搵我做MC，你要還㗎啦！」阿Sa打趣道：「估唔到咁快要還嘛！」二人又多謝阿嬌專程飛返香港撐場極有義氣，C君則搞笑說：「你知唔知，我幾多朋友知我哋開紅館特登走呀，重係移民嗰種！」演唱會在全場大合唱《舉高隻手》中圓滿落幕。
