姜濤昨日（30/4）27歲生日，在27歲第一天最後半個小時，他在IG開Live「有嘢宣布」，短短半小時吸引超過1.1萬人睇直播。
戴了Cap帽及口罩的姜濤身處錄音室，他稱已有兩年時間無開Live，又指很多人知道他開Live都好緊張。他說：「包括公司都係（緊張），大家唔使咁緊張，只係好輕鬆想分享一件事！」而未入正題前，姜濤先分享他今年生日一個人在家度過。有人問他生日吃了甚麼？他就說自己吃了燒味飯及睇戲，指近日看了多套電影，包括Micael Jackson及兄弟AK的《我們不是什麼》。
接着，姜濤說到他在生日會上分享的真心話，表示從26歲到27歲的一年，想同26歲的自己講：「辛苦你過去一年嘅一切，承受過啲乜，改變過啲乜！」而以往每年四月都會出新歌的他，今年決定「暫停所有出歌計劃」，這就是他要開直播宣布的事。
姜濤稱，今年2、3月公司都有問他何時出歌，他感覺有點像例行公事，「冇諗到出咩，過往會有好多諗法，雖然自己唔識作歌作詞，但由《蒙著嘴說愛你》後，我都會將自己嘅諗法，諗到嘅主題，會諗埋MV，寫埋Story Board畀監製，由幕後幫我實現，過去大概做歌嘅流程係咁，直至今年開始就冇咗做歌嘅創意同衝動，係遞減式，少咗好多諗法，完全冇嘢想同大家講，以往嘅歌主題有講過成長，喺呢行受嘅情緒困擾，甚至大家想聽嘅情歌都有，到而家未有嘢想分享到，我知其實我唔使諗太多，可以交畀幕後團隊去做歌，但我覺得就冇咗自己當初做音樂初心。」
對於今年暫停出歌，姜濤承認有思想掙扎過，但最後都有這個決定，「想去搵下一個新嘅自己畀大家睇，幫自己放個假，畀自己思想同個腦放鬆下。」姜濤表示有跟公司溝通，「公司初初話我唔出歌，佢哋會俾人鬧，但聽完我個Plan係幾支持，所以都幾順利。」他又透露已計劃明年出專輯，將會是今年沉澱後的成果，「我都唔知今年會經歷啲乜，要知人生好多變化，生活又會有咩變化，會將佢放落下年專輯入面，以全新自己同大家見面。」
姜濤表示，希望每位「姜家人」理解他的決定，「呢個係自己最想做嘅嘢，相信用呢一年時間搵多啲新嘢，今年會睇多啲騷，吸收養分，會喺香港或去其他地方搵唔同人合作。」最後，姜濤還笑指不喜歡他的人應該會幾開心，今年不用聽他唱歌。不過，他叫大家明年賞面聽下，又表示會接受任何意見，不喜歡只有讚美聲音。
