MC張天賦《E=MC² 演唱會2026》昨晚（8/7）在紅館舉行第二場；繼首晚請來陳蕾後，第二晚MC邀來 Gordon Flanders 擔任嘉賓，兩人台上除了大談相識點滴，MC 更爆出每日為演唱會準備的「地獄餐單」，大呻減足15磅仍不敢騷肌，「自己望住塊鏡好有信心，但對住觀眾就⋯⋯真係只可以做到露臂…..」
昨晚 Gordon Flanders 與 MC 合唱 《可以不可以》，又獨唱了《歌頓花園》，期間他關心詢問 MC 減肥情況，又祝他早日順利完成演唱會，可以大吃大喝，又表示自己也體驗過這些減肥餐，食到第三日已經想嘔，懷疑 MC 期間無可能沒有偷食。MC 即笑言自己今次真的非常節制，對住觀眾大大聲講，「冇呀，冇！」又分享自己的極速修身秘方，「我日日就係 400g蘆筍、400g肉，100g士多啤梨，兩隻蛋，冇啦！」
MC 稱餐單令他減了15 磅，內臟脂肪指數更由「6 點幾」暴跌至「4」，他說：「我其實好想借呢個演唱會除衫，真係嘅！我見到其他歌手話好嚴峻咁減三個月就搞掂，但係真係唔係咁簡單囉！我仍然係無信心除衫……啱啱開場露手臂，我覺得已經係最大嘅尺度㗎啦！」全場歌迷隨即起鬨高呼「除衫」，他即苦笑耍手擰頭，場面搞笑。
