Kiri T 早前為新歌《哈姆雷特下班了》到台灣一間流傳猛鬼的荒廢酒店拍 MV，想不到竟真遇上怪事，最後整個 MV 失去了大部份片段。Kiri 說：「今次個 MV 係阻滯到無咗嘅！本身個 MV 係想致敬《閃靈 (The Shining)》呢套電影，所以我哋就有個斧頭，MV 就係我會一直追殺一隻公仔，嗰隻公仔叫 TT，今次我哋就做咗一個黑化版嘅TT，我哋拍咗好多 Shot，係有一個故事嘅，但係就喺我哋拍完之後，導演過片時發現張卡讀唔到，最後我哋救返好少嘅片段，咁所以就整咗個 Visualizer，我唔知呢個算唔算一個靈異事件啦！」
而另外一件奇怪事，就是那個黑化 TT公仔，不知為何突然自己出現在電梯內，「係部𨋢一開門佢就喺部𨋢入面，我問哂身邊嘅工作團隊，都無人擺隻公仔喺部𨋢度，但係嗰個𨋢門一開，大家見到佢入面都有啲驚嘅，見到隻公仔無啦啦自己搭𨋢落咗嚟！」
今次新歌由 Kiri 親自作曲，聯同 Ian Ho 編曲及 Yoroko Chan 共同監製，黃偉文填詞。今次 Kiri 繼續誠實地面向內心，拆解大眾的「報復心理」；「呢一隻歌就係講關於復仇，呢個 Idea 係Wyman 提出，我覺得幾得意，因為其實呢首歌嘅 Melody 好正面，但原來可以有一個黑暗面嘅 Twist，而呢個 Twist 去到最後都係正面嘅，首歌係講唔好嘥自己嘅心力去復仇，無論你幾憎一個人好，因為最尾輸咗都係你自己！」
笑問 Kiri 自己是否一個會復仇的人？她坦言：「我唔容易寬恕人囉！我只可以話，哈哈！但係我又未至於會復仇，我會好嬲囉！我係嗰啲會磨好刀鋒後 Keep 住把刀，但係我又未至於會劈人，但我就會 Keep 住嗰把刀，所以我覺得自己都未做到《哈姆雷特下班了》嗰個”下班”嘅！」
