陳柏宇一連三場紅館《Jason Chan Live in Frames 20週年演唱會》昨晚（20/7）圓滿結束，適逢昨天是 Jason 的生日，壽星仔全晚心情靚絕，除了粉絲們全程力撐令他感動得眼濕濕，家姐 Abigail 及妹妹 Audrey一同送上生日卡兼大唱生日歌祝爸爸生日快樂，但 Abi 同時寫下「I want a dog」的訴求，此時 Jason 立即台上教女，要求她們學識關心自己和他人，以及夠整潔才會讓他們養狗。跟女兒講完道理後，再問妹妹 Audrey 想不想養狗，家姐 Abi 雖然瘋狂在旁幫口 say yes，但過去兩場都未曾開聲的 Audrey，竟首度開金口回應：「我唔想！」爆笑全場。
尾場 Jason請來相識了 20 年的農夫西裝骨骨現身，一同合唱《魔法戰隊》，及後更將 Jason 的網絡節目《廣偉論》搬上紅館舞台，討論「一人一個演唱會請嘉賓的意義」。事前 Jason 已在網上收集意見，其中有人留言指「可能某啲歌手技癢，想唱下歌俾人聽，但又唔想開成場演唱會」。陸永即表示：「唔係唔想開成個演唱會，係開唔成個演唱會。」又有網民指「同來賓喺舞台上尷尬互動，浪費大家時間」農夫即時大嗌多謝，陸永更搞笑道：「其他來賓嘅互動尷唔尷尬我唔知，呢一個，一定尷尬。」另有網民表示「俾你去痾篤尿先。」C君接力搞笑道：「可能見到我哋出嚟就想去廁所，不如試一次全場走晒去，得返我哋喺度，跟住我哋出完嚟，大家就可以入返嚟。」搞笑完一輪，三位人夫一同高歌《我連婚都夠膽結》。
本來演出過後已落台的農夫，帶同蛋糕二度上台，與觀眾們一起為 Jason 慶生，大唱生日歌。粉絲們亦早已夾計為 Jason 送驚喜，坐在山頂的觀眾一同舉起紙牌砌出「CKW I♡U」字樣，表達心意。本來準備唱下一首歌的 Jason，聽到音樂響起時，還以為出錯了一臉疑惑，但看到農夫與蛋糕，才驚覺是大家給自己的驚喜。Jason 得到連環驚喜後表示：「真係勁！多謝。我係咁話我知有呢壇嘢，但我真係好 Surprise，因為喺我腦裏面係冇咗，幾個禮拜前問我，我話一定有（驚喜），但跟住我就忘記咗！」
演唱會尾聲，Jason 唱出表達他對樂迷感謝的《沒有你，我甚麼都不是》時，聽到現場一起大合唱，即感動得哽咽一度唱不到歌。Encore 的部份更「賣大包」，連唱《Espresso 先生》、《萬中無一》、《七折》、《有我》、《親愛的仇人》和《霸氣情歌》，唱到最後一句歌詞。
足本訪問內容 請到YouTube睇片 🔴
相關報道 ⤵️
陳柏宇紅館演唱會Day 2丨邀加拿大「同鄉」Jay Fung 馮允謙任嘉賓 公開質疑對方多次得唱作人獎 但只寫一首歌給他丨Jay Fung被問可有慚愧即反駁：你都無搵我寫歌！丨田木集作
紅館現場丨Jason Chan Live in Frames 20周年演唱會丨丨太太 Leanne帶兩女兒 Abigail 及 Audrey 驚喜現身「照相館」丨師妹Vincy任暖場嘉賓丨田木集作
