Anson Lo盧瀚霆昨晚（5/7）現身亞博，出席後援會為他準備的《Amour ♡ Love L’Amour de la Fête 生日會》，與神徒玩足全晚；大合照時，他更特地要求經理人花姐多角度拍攝，務求好好記錄與神徒們的每一個時刻。
兩場《ANSON LO “KINGDOM” LIVE TOUR 2026 – MACAO》後，Anson Lo 返港出席生日會，與神徒見足三日，他表示已完全充滿電：「呢三日我都見到好多神徒，無論係Kingdom 澳門站，跟住去到Encore，甚至臨尾出咗去場館同大家拜拜。到今日後援會嘅生日會，呢三日我嘅生命係百分百充斥住神徒，完全冇咗工作呢回事，就好似同神徒一齊Vacation；我可以拋開晒煩惱，喺呢三日純粹同神徒have fun。」
生日會上，Anson Lo首次看到後援會籌備半年多的「快閃跳舞」影片，即時拿出手機拍下，又讚大家變成舞王舞后。「好開心見到大家跳舞，相信入面有識得跳舞嘅神徒，亦都有完全唔識得跳舞嘅神徒，但大家都好願意為我去嘗試。知道後援會早在半年前已經籌備，真係好感動！幾年前我有同花姐講過，想做一個萬人dance challenge，但最後因為工作檔期擱置咗，希望將來有機會可以實行。」
對於在生日會上玩反轉唱歌仔，到最後才發現遊戲玩法被全場神徒取笑，問到生日願望會否包括走出「遊戲黑洞」？Anson Lo 強調自己是聰明的，只是不了解遊戲規則，所以根本不是「遊戲黑洞」。
Anson Lo 每年生日慣例都會祝福神徒生日，將自己的大日子變成神徒們的大日子，今年亦不例外。他說：「好多謝大家仲係咁重視我嘅生日，我成日覺得我生日可以帶到開心畀大家，有嘉年華感覺之餘，自己覺得 7月係最凝聚到所有神徒嘅一個月份，可以令大家集結一齊去慶祝、為我應援。無論發生咩事都好，面對緊好與壞，但大家都會有同樣嘅目標，就是為我慶祝。」最後，Anson Lo 多謝大家在他出道8年，仍大規模為其慶生，各式各樣的付出，都令他自己覺得好重要，好窩心亦好感激。
