現年66歲的鍾楚紅多年來一直保持靚靚及仙氣滿滿，雖然已淡出娛樂圈，但與不少圈中人仍有保持聯絡及相當老友；紅姑亦是演唱會常客，早前才與陳慧琳結伴欣賞林憶蓮演唱會，還表示之後鄭秀文（Sammi）開騷一定會去睇。今日（2/6）紅姑一身白色仙氣打扮現身銅鑼灣出席品牌活動，講到現在的生活，她說平時喜歡行山及影相，十分享受自己一個人。
喜歡睇戲多過拍戲
講到影相，問紅姑可會再舉辦相展？她說現在好鍾意影動物及昆蟲，行山時見到昆蟲都會影，但就反問記者：「呢啲仲人有興趣咩？」接着，問她可知與周潤發（發哥）合演的《縱橫四海》在內地有4K版重映時，紅姑表示知道，回想當年點滴時又說：「電影始終都曾經係我嘅事業，同埋我嘅成長都喺電影入面，電影帶畀我好多，認識生活同整個世界。」那麼可有興趣再拍戲？她即笑言，「鍾珍（經理人）會幫我檔晒，要過咗佢嗰關先。但我現階段鍾意睇戲多啲，睇到香港有咁多好嘅電影，咁多優秀又出色嘅創作人，我好感動。」
再談好友谷薇麗即哽咽
另外，紅姑早前到靈堂送別好友谷薇麗（Linda）表現傷感，步入殯儀館已忍不住落淚。紅姑說：「正如我所說，如果有來生，我都希望佢係我朋友。」此時，紅姑已眼紅紅再不能說下去。
