農夫一連三場《全香港最好笑嘅演唱會》今日（10/5）圓滿結束， 除了繼續有麥玲玲、張繼聰，還有 Novel Fergus、PetPet Shawn 及組合 JFFT 任嘉賓。而台下捧場嘉賓陣容更加星光熠熠，包括黃子華、佘詩曼、張家輝和太太關詠荷，還有炎明熹及陳柏宇。C君更趁子華神在場，叫全場向子華神狠狠大叫一次「回水」，陸永則笑叫大家向阿佘大叫「除褲」。
農夫演唱會後受訪，講到選擇開下午場，全因為想觀眾睇完騷可以陪母親慶祝母親節。問二人為何不叫子華神上台合唱《上善若水》？C君即說，「佢嚟已經相當俾面，而且首歌幾年前，萬一捉佢上台又唔記得咗歌詞，咁就尷尬。」他又感激子華神，指他今次在演唱會名字上給予意見，接着10月與張繼聰的「人夫集團」演出都有畀意見。
講到張家輝激罕拖太太關詠荷睇演唱會，笑指二人地位跟胡楓睇齊，C君及陸永亦表示沒有想過家輝哥會和太太一齊出現。C君又笑說：「我哋每次都喺佢面前扮化骨龍，佢已經警告我哋好多次，唔好再扮。」
紅館現場丨農夫尾場《全香港最好笑嘅演唱會》黃子華孖佘詩曼．張家輝拖老婆關詠荷睇足全場丨JFFT 四子接捧任嘉賓丨田木集作
