林奕匡（Phil），向來有「治癒系」歌手之稱。剛剛推出的新專輯《PHILosophy》，就收錄了幾首十分「治癒」的歌曲，Phil日前接受《田木集作》訪問，便特意挑選了三首具有不同意思的情歌，送給觀眾們，當中包括《第一個早晨》、《關於愛的碎念》和《別來無恙》，希望熱戀中的情侶，或是正在面對失戀傷痛的朋友，也能藉着他的歌聲，來療癒大家心靈。
【林奕匡十年鍛鍊高忍耐力 結婚五年避同老婆嗌交 】
Phil又指《關於愛的碎念》是從另一個角度探索人與人之間的相處，具哲學性，亦具教育意義，更自認這麼多年來，一直不懂，一直不了解，犯過好多錯！「過去十年，我嘅忍耐力同脾性有好大轉變，因為呢行會聽到好多唔好聽嘅說話，最基本嘅可能監製話你唱得唔好，如果下下唔啱聽就反駁，會好辛苦。」Phil直言以同樣道理，用在夫妻相處之道！ 他續謂：「兩個人無理取鬧咁嗌交，搵嘢去拗，我覺得冇需要，所以呢幾年我哋好少鬧交，咁我絕對係忍耐力好高嗰個。《關於愛的碎念》呢首歌唔一定係講伴侶，係講唔同嘅關係，邊個冇同人嗌過交、意見分歧？係咪對方一定要認同你？其實可以互相尊重大家睇法嘅！太多人一時之氣，講咗一啲收唔番嘅說話，係會後悔㗎！」Phil自言眼見不少例子：「贏一場交，重要得過你同對方嘅關係？呢首歌嘅目的係想大家喺危急關頭時三思。」
【《全民造星》擔任評判做衰人唔手軟】
當年，Phil從加拿大返港追夢，參加《全球華人新秀歌唱大賽》成功圓歌手夢，但他原來一直都是個缺乏自信的人，「全校得我一個中國人，朋友唔多，去到 14、15歲代表學校出去比賽，贏到獎攞到獎學金，發覺大家睇我嘅目光唔同咗，音樂令我變得有自信，Change my life。」
問Phil若有機會重來，是否仍會選擇參加比賽？他說一定會，又指參加比賽會盡自己所能去贏比賽，但又會打定輸數，「最緊要學到嘢，咁我都賺咗啦！」講到去年他為ViuTV的《全民造星Ill》首次出任評判，之後又在不同真人騷任評判及導師一職， 跟花姐學做「衰人」。Phil即說：「花姐喺鏡頭後係好心軟，佢係好唔鍾意做衰人，但佢為節目效果去犧牲做衰人，我好欣賞花姐呀，佢知道節目需要係乜，我已經做好多衰人啦，有foul人㗎！」
