2021年，對樂團ToNick來說，是盡力的一年。他們有做歌、開了兩場StarHall演唱會、也有跟不同的單位合作，看似是一般樂團會做的事，但對他們來說，也是小收成的一年。
「其實我哋就算由疫症開始，或者世界極度紛亂嘅時候，我哋都係埋頭苦幹做音樂、研究做音樂嘅方法。」這是鼓手晨曦所形容的ToNick，而對於「2021年的ToNick」，他更說：「2021年可以話係經歷咗兩年自己調整，一個小收成嘅時間。我哋今年承接前兩年都一路有出歌，有一啲可以同品牌Cross-over嘅作品；籌備咗一段時間，去到7月開咗StarHall兩場演唱會。其實如果總括2021年，只可以話我哋盡咗力嘅一年。」主唱恆仔亦說2021年是沒有停下來的一年：「我記得7月演唱會之後，我哋4個就返去做歌，同公司嘅團隊開始傾未來嘅plan，究竟出年做咩比較好。好似噚日我哋都繼續討論緊首歌嘅Mixing係點，繼續做歌。」
ToNick宣傳7月演唱會時，拍了一條短片，標題為「ToNick: 依家邊有人聽香港音樂丫」，現在回看這半年的香港樂壇，他們都說，有翻天覆地的變化，像是南北極調轉了，恆仔解釋：「因為你睇到MIRROR、ERROR、MC（張天賦）、Mike（曾比特）、Jace（陳凱詠），呢啲新歌令香港樂壇變得熱鬧咗，大家好似都真係更留意香港樂壇，我係開心嘅。」小龜亦有補充：「其實個轉變係，香港嘅音樂真係變成香港嘅音樂，有人揀唱英文，有人揀玩純音樂，都有一定嘅聽眾去入場支持。香港音樂唔再局限咗喺廣東歌，呢樣嘢我覺得係超正嘅。」
對ToNick嚟講，2021年的其中一件大事，一定是晨曦化身MC SH推出Solo歌《啱呀》。「我哋用咗好多時去說服佢自己做首歌，今年真係自己Solo派咗歌，仲要feature返我哋，希望佢到時紅咗開騷，請我哋做嘉賓。」小龜說。其實近年晨㬢亦把他所寫的Rap詞給團員看，但沒人理會他。直至最近，他學會了製作技巧，把作品給團員們聽，大家也覺得值得派台。加上他們發現樂迷們在ToNick演唱會中，亦很期待晨㬢表演的部份，所以覺得是時候了，晨曦的派台歌《啱呀》就現面了。
對於未來的發展，除了ToNick會繼續出歌，MC SH也會繼續有作品，而恆仔亦說，正構思劇本，直正做到幾線發展。問到ToNick來年的音樂會是怎樣，他們都說希望是一個療傷的故事，小龜透露：「今年開完演唱會，其實我哋都儲咗少少歌。其實我哋嚟大家呢幾年都遇到好多困難，『希望』我們都講過好多，我哋希望下一個step係，大家喺療傷嘅過程，有啲嘢大家可以分享，我們將呢啲故事寫咗喺幾首歌入面，希望我哋2022年發佈嘅歌，大家聽落去喺主題上會有少少連貫性。」
除了歌曲變得療癒，ToNick新的一年，亦有一些小改變。「今年嚟緊嗰幾隻歌都有同新嘅填詞人合作，我哋都好期待。除咗我哋新歌，一路都計劃緊同唔同單位合作，可能搞Live，或者合作做啲歌咁樣。我哋都好想同其他單位合作開一個演唱會，將兩個單位嘅特別，喺音樂上有化學作用。」而要知道合作的單位是誰，就要等2022年的ToNick公佈了。
場地提供: GONUTS @gonuts._
ToNick make up: Kylahchan
ToNick 服裝: @lakh_supply
