ERROR的郭嘉駿（193）年初疑因「講錯嘢」；結果「被放假」近4個月，更絕跡社交平台似是靜思己過。直至上周六（16/5），193突然出Po預告翌日在尖沙咀現身，結果他出現並進入一間玻璃屋進行「自困74小時」。屋內佈置嚴如屋企一樣，193除了身穿睡衣外，亦帶了不少書籍及近期熱爆的「爆旋陀螺」自娛。
自困期間，193不少好友包括ERROR隊長Fatboy、偶像少爺占、Dear Jane結他手Jackal、Delta T.、霍哥、Anson Poon，還有「3爸3媽」等前往探望，今日，城中女首富劉陳凱韻女士（甘比）更帶備親手造的禮物到玻璃屋探193，向他送上鼓勵，期間193自爆有專注力不足（ADHD）的問題。
甘比首先送上親手鈎織的「193咕𠱸」給193，她說：「我嚟探你都有準備，最主要我睇到你ADHD，其實ADHD不嬲都有，只係冇人理，而家就醫學化，有個名稱喺度，我諗其實我哋以前都有，有啲小朋友特別頑皮又唔讀書嗰啲。」193聞言笑說：「我就係。」甘比表示有此問題不緊要，絕對不要因此而標籤自己或他人，而193表示：「我會自我安慰，通常啲成功人士都有ADHD。」193透露自己曾看過醫生，醫生指他的情況未需要食藥。
接着，甘比親自教授193簡單鈎織，兩人更一同鈎織一張被子，事後甘比說：「我知193有專注力不足嘅情況，難得佢有機會靜靜坐落嚟，希望鈎織可以為佢帶嚟內心嘅平靜，亦想趁呢次機會加深自己對193嘅認識，希望呢張被能夠帶畀佢一啲溫暖！」
甘比又大讚193「自困74小時」的概念相當有趣，也欣賞他勇氣可嘉，又指自己想法太多，無法停下來，估計未必有勇氣挑戰這種行為藝術，最後又不忘鼓勵193：「每個人嘅人生總有高高低低，最重要係勇於面對自己過去，今次193選擇長時間留喺玻璃屋內，其實都需要相當勇氣，呢份精神值得欣賞，希望佢能夠喺過往嘅經驗中學習，保持樂觀，繼續努力。」
