鄧麗欣 Stephy 的歌迷會「Stephy Fantasia」成立19周年，日前 Stephy 與逾 200 歌迷舉行慶祝聚會，活動上與Fans 玩遊戲、抽獎、傾偈、大合照。在與Fan答問環節中，有Fans好奇Stephy名字的由來，Stephy說一直覺得「Stephaine」這名字很好聽，但個人卻偏好兩個音的名字，所以入行後決定簡化改成叫「Stephy」，她還爆自己學生時期的往事，「大家都知我有幾個閨蜜，其中一個叫做 Sunny，而另一個叫做 Cloudy，大家估吓我叫做咩？哈哈哈…我叫做 Rainy，當時老師 Cloudy、Rainy、Sunny 咁叫，好容易記得我哋㗎！」
今年聚會令 Stephy 最難忘是加插了義賣環節，Stephy 捐出10幅畫作讓粉絲們競投，大家反應超級熱烈，最終合共籌得超過 10 萬元善款！這筆收入將會全數捐給兩間本地慈善機構，直接幫助低收入和弱勢社群，把愛心傳遞出去。Stephy 難掩興奮：「今年聚會真係好開心！最難忘一定係拍賣環節，因為舊年搞聚會時有好多人像紙版、易拉架，大家突然想到唔好浪費，所以就玩慈善拍賣，點知反應出奇地踴躍，歌迷會就想出，不如每年聚會都可以搞一個慈善拍賣，今年我就攞咗《Secret Garden》畫展中嘅畫作出嚟拍賣，現場反應好熱烈，籌咗好多錢，會全數捐畀兩間本地慈善機構，我覺得好開心好有意思，好多謝大家，希望明年可以再玩過。」
歌迷會即將邁向20周年里程碑，Stephy 笑言渴望打破傳統，舉辦一場別開生面的慶祝聚會，可積極考慮與 Fans組團旅行的慶祝大計，她笑說：「希望多啲同大家聚會，製造更多回憶，雖然咁多人一齊做嘅活動係有少少限制，要從長計議一下，不過我做咩都得嘅，我願意同大家一齊玩！好多謝歌迷一直嘅陪伴，今年直情寫咗首歌多謝大家，叫《仍留在這裏》，其中一個最感激仍留在這裏嘅當然係Fans，今年係我入行24年，時間過得好快，歌迷會邁向20周年，記得成立嘅時候，剛開始嘅點滴，話咁快已經20年，多謝大家咁多年嘅支持，互相陪伴住大家成長，係好開心。」Stephy透露未來下半年將推出新歌、新專輯與音樂騷，答謝樂迷：「上年開完紅館、澳門，今年都會有啲計劃，冇一樣嘢比開騷回饋歌迷更好，所以積極籌備，希望唔會令大家失望！」
