容祖兒6月16日將迎來46歲生日，昨日（13/6）她在海洋公園與歌迷會成員舉行一年一度的生日聚會。與此同時，祖兒又帶一班來自「香港尋求庇護者及難民協會」的小朋友睇企鵝。祖兒表示：「其實生日年年都係咁上下，好多錫我的人同我慶祝，人愈大開始覺得獨樂樂不如眾樂樂，自己咁幸福，應該將幸福分多啲比其他人，今年揀係海洋公園，即刻就諗到咁不如帶啲平日負擔不起，或者沒機會去這些樂園玩的小朋友一齊去玩下囉！ 」
講到生日會高潮，絕對是一位男歌迷自編自跳《桃色冒險》，台風十足的他贏盡全場掌聲，搞笑的是，奪冠後更除衫跳多次，連祖兒都睇到舐脷，十分搞笑；坐在評判席的彭秀慧則忍不住衝上前「測試肌肉」。除了玩遊戲，祖兒還分別唱了《Lucky Star》、《美麗在望》、《天之嬌女》、《零時零分》及《不好意思我愛你》多首歌，期間有女歌迷聽快歌都流淚，祖兒在台上看到忍不住問：「你做咩事喊呀？我唱緊快歌喎！」女歌迷即激動說：「感動呀！」祖兒也笑彎了腰說：「下，好感動？我唱快歌已經可以去到令你喊嘅效果嗱？多謝你呀！我覺得係一種成就嚟㗎！好開心見到大家，好開心今日見到你地來我生日party！」
不過，最令全場「瘋叫」的環節，是祖兒在歌迷問答時間突然投下震撼彈，正式公開明年演唱會檔期，「如果無意外，同已落實咗，出年一月我會喺啟德舉行個人演唱會。」全場即陷入瘋狂尖叫，有歌迷更搞笑表示：「我咩都唔怕，最怕係容祖兒唔開演唱會！」
活動尾聲，歌迷推出生日蛋糕，全場大合唱生日歌，而祖兒的生日願望，是希望大家身體健康、開開心心，動物們都快快樂樂，指自己會繼續做好音樂、盡一分力做多些善事，分享幸福給每一個需要的人。
