阮小儀是圈中出名愛狗之人，過去曾同時間飼養兩頭芝娃娃犬，分別是「Dee Dee」及「細佬佬」；不過，Dee Dee於2019年15歲時因腎衰竭離世！
年屆13歲的細佬佬，自發現心臟有腫瘤後，不時進出醫院，惟病情早前開始變差，小儀前陣子即使忙為舞台劇演出，仍要每天往返醫院探望，其後再接回細佬佬回家靜養，安靜地與牠一起度過最後時光，最終細佬佬今晨於小儀懷中安詳離世。
小儀今日傍晚約5時多，在社交平台貼出細佬佬的靚仔相並撰文，公布細佬佬離世消息，她寫道：「親愛嘅細佬佬：遮遮多謝你呢隻管家仔，管咗遮遮13年零9個月，遮遮遇到你，真係非常幸福。
今日2026年6月23日 早上7:30左右，你安詳地喺遮遮懷中，將個頭頭挨住遮遮左邊頸頸而離去。慢慢地感受你嘅心跳停頓，的確唔係好受，但當知道呢啲係佬仔同遮遮最好嘅福份，無需要打針針送你，冇令你辛苦好耐，遮遮只好安然接受生命最尾呢刻嘅感覺⋯⋯
佬仔，記得跟住DeeDee哥哥，佢一定會好似以前咁照顧住你。記得得閒返屋企企，記得偷𥄫遮遮，記得同過往13年幾一樣，記得樣衰衰，但又勁又model咁款就得㗎嘞。
遮遮同你嘅約定，我哋大家都要記住，遮遮知道你喜歡望我個笑笑樣，ok，遮遮會識做。不過你都係，要送返個笑笑樣畀遮遮。
好啦，呢2年辛苦喇，而家一定唔駛入醫院院，唔駛食藥藥㗎嘞，做你嘅快樂天使仔啦！遮遮love u，遮遮love lu 。再見啦 細佬佬，阮細佬佬🤍🤍」
不少圈中好友，如 FatBoy@ ERROR、劉沛蘅、當奴、李幸倪、廖碧兒、何雁詩、江若琳等均留言，向小儀送上慰問。
當年Dee Dee離世，小儀深受打擊，為了紓緩對Dee Dee的思念，之後每月也會寫信給牠，再放在社交平台抒發情感，結果要足足花了一年時間，才可以走出離別的悲傷。
