MIRROR成員Jeremy（李駿傑）等待三年，終於如願等到單飛機會，成為MIRROR第7位出單曲成員，並擇定吉日在 2022年2月22日將作品《半》面世，MV由星期二首播至今，已累積50多萬點擊。
由唱功到妖味造型，Jeremy都沒有令Unicorn（Jeremy Fans）失望，Jeremy日前接受《田木集作》專訪時透露，企劃早在去年已經秘密進行，指當日是花姐親自將這個好消息告知。他說：「接到呢個消息係上年演唱會嘅中途，突然間收到呢個消息係好開心，即刻同 11位兄弟分享咗，我都唔記得邊個係第一個，總之見到邊個就講囉，佢哋都好戥我開心，都好期待今年呈現我嘅音樂畀大家睇到，希望唔會令大家失望。」
【與花姐惡劣關係早化解】
講到之前與花姐關係惡劣，Jeremy稱早已化解：「同佢關係好好，已經冇事啦，我覺得人與人之間一定有啲爭拗嘅，我哋中間都溝通咗好多，同時間我哋計劃做呢首歌嘅時候，大家目標好一致，當我話想做呢樣嘢，花姐又話都諗住做呢樣，咁就OK嘞！」
面對新歌出爐前夕，Jeremy承認緊張難眠：「每兩個鐘就醒一次，唔能夠深沉入眠，瞓下又醒下，又擔心今日接受傳媒訪問唔知會點，因為係第一次自己一個，冇咗11兄弟喺身邊，有啲唔習慣，怕自己講錯嘢，好多嘢諗啦！」他又透露，去年演唱會後便開始構思音樂方向，不停做Research找出自己的風格及想表達的事，並親自將意念寫成千字文給監製王雙駿參考，再由周耀輝老師填詞。
【MIRROR兄弟緊張給予意見】
Jeremy又謂，一眾MIRROR兄弟比他還緊張和興奮，個個都要搶先聽：「準備期間我哋都有一齊做嘢，佢哋會好好奇，要我畀首歌佢哋聽，我都有畀嘅，佢哋聽完都有畀意見，亦有話首歌好適合我，詞好啱我，好Fit而家我想表達嘅嘢同形象，佢哋畀到好大信心我做好呢首歌。」
新歌推出前，Jeremy 在IG為新歌作預告，寫了「無畏與恐懼 / 純潔與污穢 / 生老與病死 / 光與暗 / 惡與善 / 黑與白」，是否代表着某種階段和意義？Jeremy表示：「『半』即係一半，無畏與恐懼、純潔與污穢，所有嘢都係一半，係相對，首歌係想表達呢個世界其實有好多面，有黑就有白，有好就有壞，好多嘢處於唔同面向，好多時人只偏向一面，或者忽視另一面，但人喺有多面，好定壞都係自己，需要了解多啲自己，先可以清楚知道自己係一個點樣嘅人，想渴望嘅嘢，想做嘅事。」
場地：212 Studio
服飾：Versace
Hair：Man Chan @ Chic Private I Salon
Makeup：Rainbow Chung @Annie G. Chan Makeup Centre
