MIRROR 成員呂爵安（Edan）今日（15/6）推出 2026 年第三首個人單曲《壞人一個》。新歌由 Jaime Cheung（張天穎）一手包辦曲詞、Edward Chan 及 Anson Chan 聯手監製。Edan 更再次執導 MV，以孤獨畫面詮釋愛情中「有一種愛叫做放手」的無奈與釋懷。
談及新歌的誕生，Edan 直言是一段非常特別的緣分：「呢首Demo 喺我 Pocket List 都有段時間，之前一直未有合適機會推出。直到今次出歌，直覺告訴我『係要出呢首』。我都係揀咗之後，先知原來係 Jaime 寫的。」不過，原來《壞人一個》的 Demo 本來是國語歌，歌詞好入腦也蘊含「壞人」概念，讓 Edan 忽發奇想，邀請 Jaime 親自操刀撰寫歌詞，「都有啲抱歉，嗰時想寫廣東版，係想睇變咗廣東話可唔可行，因為好多時 Demo 好聽，但變廣東話就會覺得有啲怪或差了少少，但 Jaime 好快就交廣東話版本，歌詞極度適合，冇將件事變質。」Edan 最後直接採用，最終只作了極少量的修改，十分之喜歡這個作品。
新歌《壞人一個》雖然圍繞愛情主題，卻有別於市面上常見的情情塔塔、失戀，反而是從一個比較新鮮、少見的角度切入，Edan 說：「講兩個深深相愛，但因各種因素、現實，不得不分開，好似有時聽到最深嘅愛係放手，如果你愛一個人，就算唔屬於自己，都希望佢幸福快樂。所以選擇做放手嘅『壞人』，藏著係最溫柔嘅愛。」
在聽 Demo 的時候，Edan 腦海更浮現出大量充滿孤獨與寂寞感的畫面，使他決定再度親自執導 MV。MV 的劇本完全由他的視角出發，描述一名男主角在分手後，獨自一人過着看似平常的日常生活。然而，他獨自重溫的每一件事，其實原本都是和另一半攜手完成的。Edan 說：「男主角最後選擇『不打擾』因為佢深知，如果自己繼續去打攪對方生活，其實只係一種自私嘅佔有，MV 用呢種寂寞嘅日常劇本，去呈現這份克制嘅愛。」
隨着 5 月中推出與老死 Ryan 蔡俊彥合唱的《1206》，Edan 在短短 30 日內再推出《壞人一個》，讓不少樂迷好奇今年是否主力專注音樂發展。Edan 解釋：「《1206》的誕生完全是一個計劃之外的驚喜，而今年之所以接連出歌，是因為在上半年『遲到』了。今年第一首派台歌拖到 4 月先出，進度實在太慢，所以而家要努力追 Schedule。」
Edan 又透露《壞人一個》原本預計在 5 月中推出，但因為《1206》的驚喜出現，最終延至 6 月中旬面世。他承諾今年依然會非常專注在音樂上，腦海亦有很多不同的音樂想法想呈現給大家，接下來會繼續入錄音室錄歌。雖然公司已「開綠燈」支持他籌備更多作品，但下半年工作行程安排緊湊，一切要視乎時間分配、例如能否收到心儀 Demo 及錄音進度，但會盡力出歌。
Edan 今年三首作品均由自己執導，問他是否想向幕後導演方向發展？他笑稱自己都是剛察覺：「其實冇特登計劃每首都要自己拍，純粹機緣巧合。一來自己真係對首歌很有畫面同想法，二來好多優秀嘅導演都需要提早排期，時間上未必能完全配合。後面嘅歌我都未必會繼續自己拍，一切睇時間做人。」他強調目前並沒有將「成為導演」設定為特定目標，只是當自己對作品有強烈感覺時，希望用最直接的角度，將自己內心深處的畫面和情感百分之百呈現給觀眾。問他可有想過將來幫 MIRROR 其他隊友執導 MV？Edan 即幽默回應：「咁就要睇有冇人邀請我，不過我嘅酬勞好貴！」
