經過半年的《全民造星IV》比賽，加上只有18日時間「成軍」兼錄歌、排舞及各項準備，由隊長沈貞巧（Gao）、成員邱彥筒（Marf）、許軼（Day）、蘇雅琳（Ivy So）、陳泳伽（Winka）、李芯駖、蘇芷晴（So Ching）及王家晴（Candy）所組成的8人女團COLLAR，於1月12日正式出道。出道短短兩日，她們星期五在ViuTV接受《田木集作》的專訪。
一天之內，COLLAR分別要接受多間媒體訪問，問到她們覺不覺得累不疲累時，大家都一致回答「攰」，這時Ivy So就甜甜的說：「攰，但想做《田木集作》嘅訪問。」引得團員們都笑出來，都在說她「襟撈」，而這個玩笑，大概能令團員們忘記一時的疲倦。
出道翌日，COLLAR的《Call My Name!》MV就在YouTube上架，直到訪問時，MV上架不足24小時就有接近60萬點擊，問到有沒有信心能在本星期超過100萬點擊，她們都沒有信心回答這問題，但Ivy So就很明確地說「有！」，「我覺得參加《造星》咁耐，凡事要相信，要畀自己一個目標，我相信我哋會有1M㗎，相信就能成真。」團員們都紛紛相信自己能做到，而截至星期六凌晨零時，MV已有接近74萬Views，COLLAR的魅力，大家也能感受到吧！
在《造星IV》總決賽後，經理人Wing曾開玩笑地說女團是要跟MIRROR競爭，提到這一點，隊長Gao就一臉認真地回答：「其實我哋唔係真係想競爭，我會覺得良性比較係需要嘅，因為咁先可以進步。老實講，我們呢幾天出道就有咁多人支持我哋，都係MIRROR佢哋最初幾年付出咗好多心機同堅持喺佢哋男團嘅路。可以試吓回想吓，當初佢哋乜嘢資源都冇嘅時候，佢哋可以行到今時今日呢個狀態，同埋佢哋做到嘅所有本地藝術，其實全部都係花咗好多時間心機。」Marf亦補充MIRROR帶動了整個樂壇。Gao續說：「雖然佢哋而家好似係一個明星，好似好遙遠，但見返佢哋都係好熟悉，佢哋都仲係佢哋，呢一樣係好值得學習。」
回想當初在拍攝《造星IV》時，花姐曾說過參賽者的質素很差，到現在Day就覺得仍不能「打花姐臉」，「我覺得花姐要求好高，如果佢睇我哋嘅表演，會挑剔到好多地方。我哋的確有好多地仲需要進步，我想像到佢可以挑剔我哋嘅地方。」。So Ching亦贊同Day的說法，「我仲覺得無論去到咩位置，都一定有好大嘅進步空間，所以我哋點都有空間去進步。」Marf則覺得不是能「打花姐臉」，而係能令花姐驚喜，「佢係冇諗到呢班女仔係可以做到佢鍾意或者欣賞嘅表演。」
問到大家對於自己能進女團有沒有覺得驚訝，芯駖就表示自己是最驚訝，「我呢個年紀入女團確實好受爭議性，我身邊所有朋友都驚訝。我覺得唔太真實，因為都冇乜時間消化呢件事，但係開心嘅，因為有好多fans支持我，有好多DM話畀我聽我好勇敢。」Candy都說：「我覺得驚訝位係冇諗過會發生喺自己身上，以前係睇住人哋出道，會覺得呢啲機會唔屬於我。」
對於未來她們希望成為怎樣的女團，Winka說希望是一個團結的女團，「假設以後大家有少少意見不合嗰陣，都可以攞出嚟講，因為我哋要內部團結，知道大家嘅想法，先可以形成一個好有力量嘅能量球再彈出去。」芯駖亦同意Winka的想法，當大家沒有心病，才能全程投入表演，不會辜負幕後團隊的幫忙；而Gao與Day則希望能學習更多，打好根基，做出有質素的表演；Ivy So跟So Ching就希望大家都能健康，Marf更希望她們8人之間能有羈絆，因為這樣才能慢慢了解對方；Candy就希望未來能有不同風格的歌曲，「當初我哋改COLLAR呢個名，較中性啲嘅名，想我哋有唔同嘅面向、唔同嘅風格。希望可以喺呢一年呈現唔同嘅風格畀觀眾睇，認識我哋更多。」
COLLAR在出道發佈會就宣佈3月舉辦演唱會，她們都說對演唱會有信心，Winka更指是吸引力法則，一定要有信心！Marf更指，「因為今次係想突顯我哋8人嘅性格或者quality，有信心嘅原因係因為我哋清楚自己。」芯駖補充：「因為呢個始終係第一個叫做公開嘅演出，所以我哋一定會all-in。」縱然最近疫情比較嚴峻，未知能否如期舉行，但COLLAR各人都有跟公司討論有甚麼內容，相信各位歌迷，一定很期待看到她們的演出！
Makeup： San chan、Kineks Ho、Cathy zhang 、Janice wong
Hair: Heitai、Kenji Chan 、Vic Lai 、Kristy Wailing、Taurus Lee
Wardrobe：
Majeparis(Gao)
Celine(Candy)
Chloe(Sumling)
Marcjacobs、Miumiu、Louboutinworld(Marf)
Sandroparis、Majeparis(Ivy)
Berluti、Hm、Louboutinworld(Soching)
Hm、Moncler(Winka)
Miumiu、Louboutinworld(Day)
