PROMISE直譯是「一個承諾」，對樂團ONE PROMISE來說，那一個承諾是兄弟情，要齊齊整整四人一同踏上舞台。
主音文廸、結他手天衡、低音結他手Sora在中學相識，2002年組成EMPTY樂團，2013年Anton加入，6年後改名ONE PROMISE出道。由組團到出道的17年，每壹步也得來不易，正正因為一同經歷過很多，所以感情好得可以經常開玩笑。
日前，ONE PROMISE接受《田木集作》專訪，問到眾多工作中，如果只能選一樣來做，他們會選哪一樣？天衡回答：「如果只可以揀一樣，我一定會揀台上表演，但有一個條件，我一定要同呢三個人。」但卻被其他三位團員拿他開玩笑：「見你同AK（江𤒹生，Anson Kong）表演都好開心喎。」、「你好似享受啲喎。」天衡也只能笑着回應：「咁AK係好過你哋！」
現在能笑着面對很多事，但其實ONE PROMISE在這17年間亦曾遇到低潮，想過放棄做音樂，Sora更說自己到現在也經常想放棄：「因為可能我嘅正職係最唔貼近音樂，我係葡萄酒銷售員，朝九晚五、湊仔呀，所以我會覺得做一個平凡人，正常過活咪得囉，好似輕鬆啲，少啲負擔。但其實我又好enjoy做音樂，好想做好呢件事，都係喺一個辛苦嘅現實裏面，跳出嚟畀我去避一避。同埋有佢哋喺度支持我，就算嗰刻幾辛苦想走都好﹐我會覺得唔需要去到呢一步住喎。」
文廸說他們選擇了一條不太平坦的路去行，但慶幸身邊總有其他三位團員；Anton更覺得能走下去，是因為他們四人之間都坦誠：「可能關係或者情緒唔好嗰陣，永遠有人攞出嚟討論。我哋係咪紅，係咪出名都唔係最重要，反而一班人做好一件事係最開心。」天衡表示，他們能堅持到現在除了因為四人「心地」好同坦誠，還有因為他們的運氣好：「四個人好難同時低潮，甚至好難三個人一齊低潮。」
去年10月，Anton因為右手兩隻手指骨枯，宣佈休息一年。之後推出《明年見》，與歌迷約定一年後見。這一年快要過去，Anton的手仍未有進展，但他已學懂平常心面對，更一直找其他方法與團員們一同在上台表演。他說：「自己本來想2022年先上台，但咁啱11月13號有表演，嘗試推前啲。試過和音，但自己好似唔識唱歌咁，要多啲時間練；亦都試過Rap，英文同拍子比較易上手，但對我嚟講都係一個幾大嘅挑戰。」11月13日，他就決定以Rap取代打鼓，與兄弟一同上台。
會遇上挫折、遇上低潮，ONE PROMISE四位團員都說自己只是一個平凡人，所以他們在日前推出新歌《平凡人的自傳》，訴說平凡人的故事。文廸介紹新歌時提到：「其實我哋四個都係平凡人，面對世界好多困難嘅事，我哋都會覺得自己冇咩能力去改變或者挑戰。『夢』呢個字對好多人嚟講已經好遙遠，唔敢去做，但我覺得作為一個平凡人，每個人喺自己嘅領域入面，只要聽自己心入面嘅說話，每個人都可以為自己喺唔同崗位上變得不平凡。」