「孤獨」與「寂寞」很多人也想避免遇上，但商台DJ薛晉寧（阿檸）就選擇接受，更將它們放上舞台，在聖誕節以「孤獨」與「寂寞」做主題，開Talk Show「HAND SOLO 單手派對」，內容大致會說「點解人會孤獨，點解決孤獨，咩係孤獨，咩係寂寞，有咩分別」。
【孤獨VS寂寞】
對阿檸來說，孤獨與寂寞就像是Facebook status一樣，他解釋：「講Facebook status好似上一個世代嘅嘢，因為而家已經係IG嘅世代，但係IG係冇Status。新嘅世代係冇咁多麻煩事，你有歷練先會感受到孤獨寂寞，所以你後生嘅話係感受唔到㗎。」佢更解釋，孤獨與寂寞的分別是在於，一個能看到，一個是看不到，但想知更多，他就說要到現場看他的Talk Show。
當感到孤獨或寂寞，阿檸的做法會不一樣。「當我孤獨嘅時候，我九成九會去砌模型，最好㗎喇，完全冇人阻住你冇人煩你，你真係可以沉迷嗰樣嘢，好快會過咗一日。但係寂寞就唔同，因為寂寞係比較心靈上嘅東西，寂寞我多數會創作，因為你有情感時就創作，你見大部份市面上嘅作品都係唔開心嘅作品。」
【《Hand Solo》VS《聖誕十字步》】
聖誕節，理應是一個與家人朋友相聚，一班人開派對普天同慶的日子，但阿檸選擇在平安夜以及聖誕節開騷，原因在於讓那些沒有參與派對的人到他的「派對」中：「都係一班人之嘛，只不過你全部人都唔識。嗰啲孤獨嘅人就算你畀個真嘅Party佢去，佢都講唔到嘢，佢都係一個人都唔識。」
Talk Show中會有五首相關的歌曲，當中有三首歌《encore》、《Hand Solo》與《聖誕十字步》亦已推出，餘下的兩首歌，就要在Talk Show中才能聽到。這五首歌，都是在Talk Show中用作承接，亦是由阿檸填詞，《聖誕十字步》就是與Jan Curious（阿水）一同創作。這歌的出現，是因為在說兩個「麻甩佬」一同過聖誕：「我同同一班男仔過聖誕好多年喇，唔知點呢班人每年都唔可以正正經經，喺出面搵個人同佢哋一齊過，永遠都鍾意幾個人聚埋一齊。男仔同男仔之間嘅友誼好得意㗎，你同佢幾好朋友係唔會講，擺喺心入面。愛唔愛對方呢？愛嘅。係咪Gay呢？唔係Gay。」
《Hand Solo》就是在研究為何自己是一個人，「點解我哋就算有人同我哋一齊嘅時候，都好似係一個人；當有咁嘅情況，點解我哋又追求要有多一個人喺身邊呢？」而《encore》就是一個Loop，像是安安靜靜地過度，但又不斷重覆，像是在拍拖再分手一樣，原因會否在你身上呢？
【樂壇新人VS DJ】 因為有派台歌，阿檸成為今年樂壇新人，他聽到這個形容，也不禁笑了出來：「我都吞一吞口水呀」。對他來說，自己每年也是新人，他說到：「我每年都係做緊一啲嘢嘅新人囉，不論係廣告、舞台劇、導、或是編，都係每年學一些新嘢。我諗人嘅學習過程都係咁，每年都唔好剩係做自己熟嘅嘢，離開下固有嘅框架，學習一啲新嘢。」
談到不習慣的事，就是要克服恐懼，「因為你唔係一個歌手，我平時係做開廣告配音、DJ，我係好熟悉用自己把聲，但去到唱歌都仲係需要克服一啲聽返自己嘅心理恐懼同埋尷尬。我諗唱歌就好似重新一次嗰時啱啱開咪做DJ嘅嗰個階段，我諗好快會熟習。所以而家要享受呢個未熟習時嘅新鮮感，因為嗰陣開咪我冇享受過，我只係覺得驚，係好無謂嘅一件事。」
【阿檸的孤獨等級表】
第一級 追星
第二級 扭極都唔中想要扭蛋
第三級 班Friend去玩冇嗌你 仲Post咗相（喊）
第四級 Best Friend識咗新BF
第五級 綠色和平（被笠綠帽扮冇嘢）
第六級 遇見地板精靈
第七級 被冇好感嘅人約見面，而你去咗。
第八級 被愛人嗌錯名
第九級 想分手但唔講
第十級 對方想分手，又唔講，係咁喺度等你講