女團COLLAR成軍後第一個綜藝節目《我哋係COLLAR》終於推出，呢個節目除咗可以令觀眾認識八位成員Gao、Marf、Day、So Ching、Candy、Ivy So、Winka同芯駖外，同樣令佢哋透過拍節目，加深成員之間嘅了解，令團隊更有默契。
昨日COLLAR接受「田木集作」嘅大問答挑戰，每人先打開手上信封看問題，問題可以選擇自己答，亦可以指定其他成員回答，最後八位成員都互相點名回答問題，當中包括「邊個最適合做副隊？」、「睇好邊個出第一首單曲？」、「同邊個成員最有隔膜？」等等。講到最難答一條，本來抽中題目嘅Marf，「陰陰嘴」笑後就秒速交咗畀Day去答，究竟Day要答咩問題？又答唔答得中？
另外，COLLAR對於任張敬軒演唱會嘉賓，評價好壞參半，芯駖有乜嘢想講？想知道更多內容，直接Click入去睇片啦！