MIRROR成員邱傲然（Tiger）於演唱會前，再與天衡、梁栢堅攜手合作推出以探討緣份為題的新歌《呼吸一世》。對於歌曲的概念，Tiger有一套深刻的體會：「我覺得緣份其實同煙好相似，會有一霎嘅溫暖，但點樣都會有煙消雲散嘅一日。人同人嘅緣分，就係陪住對方走過生命中某一部份嘅路。當完成咗呢個使命之後，命運就會自自然然要你哋分開，哪怕是離去的死亡，其實都只係緣份盡頭嘅一個展現。」
雖然歌曲帶着一絲傷感，但 Tiger 希望傳遞的是一份釋懷與大愛：「無論緣份帶我哋去到邊度、去到最後完結，我哋都係祝福對方是好的。」他又笑言，自己現實中是個不折不扣的「隨緣派」，因為些事無法強求，強求都無用就不如 go with the flow。
MV 拍攝當日正值暴雨夾雜的日子，海面更泛起陣陣白頭浪。Tiger 與女主角劉語喬需要乘坐一隻小艇出海，他回憶當日情景也覺非常驚險：「好彩最後我沒暈船浪，但女主角就比較辛苦，佢真係比較敏感，所以拍得好辛苦。由於海浪強勁，現場更需要三、四名壯男合力穩定船身，兩位主角最後更要親自落水拍攝。Tiger 表示：「幸好當日氣溫唔算凍，但呢個 MV 絕對係台前幕後所有人心機同心血嘅結晶。」
隨着《呼吸一世》的推出，這亦是 Tiger 演唱會前的最後一首派台歌。目前距離 6 月 27 及 28 日舉行的演唱會已進入最後倒數階段，「今次演唱會真係去到最後直路，我哋想盡能力去玩一啲全新嘅項目。無論係歌單、衫定係舞台都想唔同。」
