受疫情重創的電影業，早前面對戲院被逼關閉，多部電影都要延期上映，其中由黃德斌、張繼聰、吳卓羲、譚耀文及栢天男主演的電影《逃獄兄弟2》，隨着政府宣佈放寬社交距離及重開戲院、表演場地，電影公司已公佈會在4月28日上映。
早前，張繼聰、黃德斌接受《田木集作》專訪，提到電影雖然以逃獄為主題，但第一集戲內不乏喜劇元素，令觀眾看得過癮，第二集貫徹以喜劇作包裝，張繼聰笑言搞笑部分都由他擔當：「喜劇上主要都係我負責去做啦，因為佢哋呢啲型男，都係啲劇力萬鈞嘅嘢。」他又指今集在戲中除了不時受到飾演鄧獄長嘅德斌蹂躪，又被新入獄的吳卓羲強迫下協助他逃獄，可謂受盡壓力，他說：「所以戲劇上嘅衝突都係好強，我覺得今集仍然有喜劇嘅前半部，但後半都係一啲比較認真啲嘅戲。」
今集戲中有場三大型男吳卓羲、黃祥興及栢天男（Adam）的出浴騷肌戲，問到已修身成功的張繼聰為何不一同展示成果？他笑說：「除咗衫咗咁多年我都攰喇，我都好想擺脫下做出賣色相、做艷星呢個行業，就交返畀Adam同阿祥興佢哋去做。睇到佢哋每日就係食到好清嗰啲咁，就會覺得好彩冇我份啫。」
說到鄧獄長的角色，德斌指他將黑化步入成魔之路。「唔只狠，喺裏面佢係處於一個壓力嘅人物，係步入去成魔頭一個感覺，如果想睇獄長呢個人物變化，大家期待第三集啦，第三集個人物直情入魔咁樣。」
對於電影這個工業，兩位表示仍有不少崗位想挑戰一下，張繼聰指希望嘗試更多角色，而德斌說表示欲一嘗導演滋味：「呢個工業裏邊好多崗位我自己都有興趣好想試，幕後嘅崗位呀、導演、剪接、音樂配樂，好多我都成日都有想像，但係實唔實現到我諗睇緣份。」
