Anson Lo（盧瀚霆，教主）今年第一首新歌《Mr. Stranger》已經推出，MV上星期五在YouTube首播，27小時已經衝破百萬點擊，速度是MIRROR成員之冠，而且數字不斷上升中。日前Anson Lo接受「田木集作」專訪，講到《Mr. Stranger》的誕生，是取材自己去年底壓力爆煲的經歷：「想清楚將嗰份壓力寫喺歌入面，可能大眾對我有特定嘅形象同性格，咁大家願唔願意揭露我真實一面呢？對我呢一面會唔會好驚訝呢？」
Anson Lo講到壓力爆煲源於自己，因為當時有好多注意力都放在他身上。他說：「好驚自己做唔到大家要求，因為大家對我要求都好高，尤其觀眾層面廣咗，好多小朋友Fans，自己都好顧自己儀容，想做到100%完美，最誇張係連自己都用咗花姐嘅standard畀自己，連一條毛走出嚟都接受唔到，有段時間係沉溺咗工作世界入面，冇得放鬆。」
【學懂放過自己 決定跳出舒適圈】
除了自己給自己壓力，Anson Lo直言網民留言亦會影響到他，他表示：「試過初出道分享一啲冇剃鬚嘅相，網民會話呢啲相會唔會好影響你形象？會唔會令啲品牌唔鍾意？大家好多意見，久而久之就令自己繃緊，係咪都唔好冒呢個險呢？係咪留喺舒適圈好啲？」不過，Anson Lo最終明白壓力是來自自己，除了用「爆喊」來釋放負能量，最重要識得「放過自己」，所以他今年決定跳出舒適圈，不論歌曲及演戲上都會有新變化，接受不同挑戰。
講到外界一旦不接受他的改變，他又會如何取捨？Anson Lo說：「視乎做嘅嘢係作品定係我言行舉止有失誤，如言行失誤就要改善，但如果係作品上嘅轉變，我相信如果我決定得去做嘅作品，起碼係我自己接受到，如果觀眾一時三刻未接受到嘅話，自己都會當一個新嘗試同挑戰，當係學嘢。」
【Tiger邱傲然是MIRROR中的「Mr. Stranger」】
Anson Lo指今次《Mr. Stranger》是一首節奏比以往更明快的曲風，有一種強勁氣勢及暗黑風，去年的《Megahit》有一個招牌「Uh-oh」手勢，今次同樣創出一個「爪牙」手勢讓「神徒」一齊做，Anson Lo說：「Rock Sir佢排呢個手勢係模仿吸血鬼嘅爪，聽到《Mr. Stranger》都會有呢個手勢。」至於《Mr. Stranger》MV造型及暗黑主題與Jeremy的《半》MV感覺相近，Anson Lo說Jeremy的《半》是中版節奏，與《Mr. Stranger》完全不同曲風，加上暗黑主題都以有多種演繹方法，「Jeremy喺出歌前三日都有畀過佢Final Vision我聽，我哋大家都話真係唔使驚，真係唔似。」
問Anson Lo心目中，MIRROR兄弟中誰是「Mr. Stranger」？Anson則選了Tiger（邱傲然）：「我喺「全民造星」第一季時同Tiger基本上係1%接觸，純粹Say Hi，眼神對望一下咁就完，畀我陽光嘅小朋友就係咁。到MIRROR出道後，就發現其實佢講嘢好大佬嘅感覺，佢又會突然好溫柔貼心，令我有種觸摸唔到感覺，即係佢喺軀殼上，未必會成日用言行舉止表達內心性格，但佢裹面係好感情豐富嘅人，只不過你要用時間同佢相處，先會感受佢真實一面。」
想知今次訪問足本內容， 想知Anson Lo有甚麼壞習慣？立即睇片啦！
服裝： Paul Smith, Joyce, Giuseppe Zanotti
Makeup： Rainbow Chung @Annie G. Chan Makeup Centre
Hair： Denny ku @CHIC Private I Salon
