救助無數大小毛孩的「大樹下善待動物庇護站」最近再度出現資金告急，歌手黃淑蔓（Feanna）日前帶同Fans、貓狗糧及與公司同事集資的利是前到「大樹下」做義工，了解他們的日常工作。Feanna亦希望更多人關注，幫助「大樹下維持日常營運與緊急救援，改善毛孩生活。
被熱情狗狗抱抱激吻
Feanna覺得此行好有意義，她說：「我同Fans一齊做動物義工，呢度照顧超過一百隻貓狗，每日嘅食物同醫療開支都好大。」Feanna與Fans到步後，先從義工口中了解不同貓狗的性格及需要，然後再替狗狗梳毛和餵食，期間更被熱情的狗狗「抱抱」索吻，她笑言：「無諗過我嘅螢幕初吻係畀咗狗仔，佢嘅熱情同埋衝擊，殺我一個措手不及，佢真係好可愛。」
之後Feanna與Fans帶着零食去「貓舍」，當她坐在梳化上，貓貓立即湧上前討抱，其中一隻成功伏在她大腿上的貓咪，更出手打其他貓要獨霸Feanna，Feanna也盡量左擁右抱滿足貓貓。她說：「唔知返到屋企，兩隻貓聞到我身上有其他貓狗味道，會唔會好嬲？剛才入到貓舍，感覺嗰度就係屬於我嘅地方，一入去坐低，啲貓貓就衝晒埋嚟，要我哋摸摸同埋拍Pat Pat，其實貓狗都好需要人陪伴。」
做個有責任主人
因為嚮往貓咪無拘無束的性格，Feanna早前創作新歌《喵！》，問她會否為狗狗寫歌？她說：「如果我要寫一首關於狗狗嘅歌，可能要等我真係養咗狗先。其實我由細到大都好想養狗，但要做個有責任嘅主人，每日帶佢落街散步、居住嘅地方，同埋經濟狀況穩定，我先至可以再養多一隻新嘅動物，領養前三思，係一生一世嘅責任，諗清楚先至帶佢哋返屋企。」
雖然未必每個人都可以在家裏養貓狗，Feanna建議可參加「助養計劃」，她說：「每一隻狗仔都有佢嘅身世故事、身體狀況，『大樹下』好需要大家支持和捐款，至可以繼續營運落去。有養寵物都知道醫療費用真係好龐大，希望大家有錢出錢，有力出力。」
