華星唱片成立55周年，曾有「華星三寶」之稱的梁漢文（Edmond）、陳奕迅（Eason）和楊千嬅，近日接受唱片公司YouTube 頻道節目訪問，分享當年在華星的成長點滴，三人碰頭即雞啄唔斷，現場充滿笑聲。
三人首次碰面，是在 1995 年 Eason 和楊千嬅「新秀」比賽結束後，隨「華星」大隊去慶功 Party，現場除了 Edmond，還有許志安、鄭秀文、海俊傑、張崇基和張崇德等。由於三人之後因經常同坐一架媬母車，因而開始熟落。
Eason講起當年一齊坐車，還說最慘一個是楊千嬅，他說：「千嬅最慘，因為佢自己化妝要早兩個鐘起身，公司車第一個接佢，再去接 Edmond，佢哋喺九龍，最後過海接我。因為公司喺灣仔，到收工就放低我先，千嬅最後先落車，返去仲要落妝，即係最遲休息，好慘。」Eason 又爆料：「Edmond 出名喺媬母車食嘢，而杯奶茶係唔會倒瀉，好高技巧！」在旁的 Edmond 則興奮讚自己：「係呀，轉彎、剎車都無事！」
至於「華星三寶」這個外號，原來是當年高層吳雨被街頭小食「煎釀三寶」啟發，Edmond 表示：「嗰陣我哋差唔多時候 plug 歌，一齊上唔同嘅節目做宣傳，成日都一齊做嘢，然後就醞釀咗《大激想》出嚟！」Eason 和 Edmond 聞言即手舞足蹈，但千嬅在旁笑說現在年紀大，身體關節問題已跳不到。
Eason 和 Edmond 又說，最難忘是拍《大激想》廣告當晚發現他們成為了雜誌主角，Eason 說：「嗰晚喺西環拍通宵，千嬅埋位拍嘢，我同 Edmond 踎喺電車站無聊揭雜誌，見到寫我哋『不和』，好好笑！」
Edmond 指華星有一種特別氣氛，就好似一間音樂學校，透過歌唱比賽培育出不少歌手，再為他們出歌，令他們有所成就，一代一代地傳下去，同時亦維繫到一班歌手的感情。Eason對此也有同感，指甚至連幕後的同事也有這種感情，十分難得。
