改編自日本喜劇大師三谷幸喜同名作品舞台劇《The Magic Hour 魔幻時刻 》，昨晚（28/6）於香港演藝學院歌劇院完成29場演出。謝君豪、葛民輝、韋羅莎、江𤒹生、魯文傑及蔡曉童等一眾主演，謝幕時一同向觀眾致謝。
謝君豪（豪哥）分享完成演出感受，坦言要重新適應生活：「由四、五月開始排戲，到而家基本上一直都經歷緊『魔幻時刻』。睇住成套戲一步一步成形，好似自己都同套戲不可分割，成個生活都投入咗落去咁。」他又表示，最開心是見到整個團隊都樂在其中，每位演員都非常投入；又感觸提到，Technical Rehearsal 期間收到恩師 King Sir 離世消息，一度心情恍惚，更擔心自己能否完成首演，「當時我企喺台邊望住舞台嘅霓虹燈佈景，突然令我明白King Sir 一直以來對演出嘅堅持同精神，所以更加提醒自己要完成呢個演出。」
阿葛直言最想感謝的人是豪哥：「豪哥簡直係『喪』㗎！大家一直都覺得謝君豪係演正劇，但原來骨子裡佢癲到天頂，超級 Hyper！喺佢領導之下，每個演員都玩得好開心，演出時就好似陪住佢一齊玩一樣，所以真係好多謝佢帶我哋進入呢個『魔幻時刻』！」阿葛笑指，完騷後最不捨是劇組的「福食」，坦言十分期待慶功宴。
韋羅莎（Rosa）亦表示，豪哥一直都是她的偶像：「我由初初畢業加入香港話劇團做全職演員時，已經有機會同豪哥同台，不過當時冇乜對手戲，只係得兩句對白。一路以嚟睇佢嘅電影、舞台劇，到而家可以認識佢、同佢一齊排戲、傾偈，不斷吸收佢嘅經驗，真係好多謝佢！」江𤒹生（AK）則說，今次與豪哥有最多對手戲，因此特別感謝對方：「真係喺佢身上學到好多。」他又分享，完騷最不捨是由排練到正式演出，那份規律而穩定的工作節奏。
蔡曉童（童童）指捨不得這個劇本：「我睇咗成個月呢個咁好笑嘅劇本，我相信將來都會好回味今次嘅演出同製作。」她更悄悄分享與 AK 合作時的一件趣事：「由於我哋有好多對手戲，畀我發現到 AK 原來有鼻敏感，可能觀眾遠睇唔到，但我喺台上成日見到佢流鼻水，所以我會成日袋住紙巾，一有機會就遞畀佢抹。」
